Txiste-txapa, kuanto, WhatsApp-a (txapa, kalaka, tabarra, alamena, lata). Betidanik hala izan da, noski; baina, lehenaz gain, areagotu egin da koronabirus garaiotan; hain zuzen ere 2020an, bi aldiz 20an, hala kasualitatez tokatu delako. Euskaldunon zenbakeraren oina hogeinakoa da: berrogei, hirurogei, laurogei, bost-hogei. Bai, bost-hogei ere erabili izan da; baita hogei-aldia ere, hiru asteko tartea adierazteko… Eta, COVID-arekin lotuz, hogei aldiz hogei, laurehun gau eta egun  baino gehiago badarama dagoeneko gurekin: 2020, aurtengo urte malapartatua.  Hogei-aldia, berriz (etxealdi/itxialdi), hiru astekoa ez, hiru urtekoa ote dator!? Horren harira, hona nire guaxapeko txiste bitxi edo albiste pitxien sorta bat…

Zorionekoak pandemia garaian kalerik kale, festarik festa, zurrut eta purrut dabiltzanak, aurki dute-eta Jainkoa aurkituko! (D. A. Maradona hil berri).

—Kontxi…! Hemen naiz…

—Nolatan, gizona…!? Zer dela-eta zu hemen etxean horren goiz…?

—Hauxe delako zabalik topatu ahal izan dudan bakarra!

Antzina, Tutankamonen hilobia zabaldu zutenean, arkeologoak poliki-poliki, banan- banan, hiltzen-hiltzen hasi ziren… Iaz Franco atera zuten bere hilobitik… Nik ez dakit ezer…; aipatu besterik ez dut egiten…; hor konpon…

—Laztana, ni azkarra naizela uste al duzu; buruz argia, alegia…?

—Bai; baina asintomatikoa.

Koronabirusaren proba norberak egin ahal izateko jarraibideak eskaini zizkidaten herenegun: «1., atera baso bat ardo eta saia zaitez hura usaintzen. 2., usaina hartu badiozu, jo tragoxka bat, ea dasta dezakezun. 3., usaindu eta dastatu ahal izan baduzu, pentsatzekoa da zuk ez daukazula COVIV-19rik»… Atzo ilunabarrean bederatzi aldiz egin nuen proba eta denetan negatibo eman zidan; zorionez. Gaur goizean, ordea, kaskarreko min pixka batekin esnatu naiz eta gaisotasunaren sintometako bat izan daitekeenez, noski, gaur iluntzean ere, badaezpada, berriro egin behar ditut bederatzi testat. Nerbioak airean nago…!

Aurki poliki-poliki, astiro-astiro, irekitzen-irekitzen hasiko dira elizak eta motelak… Bien bitartean, arren eta otoi, pazientzia erregutzen zaie, egonarria!, hala kristau leialei nola bilau desleialei ere.

Konfinamenduaren ondoren, lehen-lehendabizi itsusiak aterako zarete kalera, plazara, tabernara; zomorro malapartatua uxatze aldera, baldinbaitere!

Post data: WhatsApp ingelesa bada, zergatik datozkit txiste guziak gaztelaniaz? Zergatik ez euskaraz? Euskaldundu dezagun guaxapa: zuk, irakurle, mesedez, bidali txiste hautakoren bat (edo bi) zure lagunen bati (edo biri). «Gatz eta hats emaiogun euskaldun tankeraz, geroak izan dezan Wua-Txapa euskeraz!».

Bizargorri, 2020-12-02

© bizargorrizena for Bai Horixe - Bizargorri, get_post_time('Y'). | Permalink | No comment | Add to del.icio.us
Post tags:

Feed enhanced by Better Feed from Ozh

The post TXISTE-TXAPA DA GUAXAPA appeared first on Bai Horixe - Bizargorri.